The History

Bald 10 Johr sinn jetzt scho vergange sitt's BBK git. Zu de Urgründer vo de BBK ghöre vier Mitglieder: Dr Christian (Inka), dr Piter (Panzer), dr Oliver (Fossi) und dr Andreas (Bundy), do e Gruppefoti ufem Wäg nach Korsika. Zämme hämmer insgesamt vier "wildi" Schueljohr in de Sekundarschuel z'Rhyfälde verbrocht. Damals hett's BBK noni offiziell gä, gsoffe hämmer aber scho denn wie d'Löcher in diverse Klasselager und natürli au im Abschlusslager vo dr Schuel.

Nach dr Schuelzit, im Summer 1995, hämmer unseri Schuelkamarade uss Rhyfälde nümm so oft gseh und hän uns meh z'Kaiseraugst droffe zum go drinke. D'Liebrütibeiz in Kaiseraugst isch unseri Stammbeiz worde und mir hänn uns fascht jede Obe gseh uff e baar Bierli. Am Sunntig hämmer de Jugendrum Kaiseraugst demoliert und au s'Schwümmbad im Dorf isch zummene Träffpunkt worde zum drinke, grilliere und Blödsinn im Wasser (z.B. de bekannti Dreierturm, Waling, Spicking und Lüpfing) mache.

Do mir die meischti Zit zu viert verbocht hänn und me uns fascht immer nur im Zämmehang mit Partys und Bier adroffe het, isch uns die Idee in Sinn ko: Mir trinke sehr vill Bier, mir gsehn uns so oft wie Brüeder und mir sinn alli vo Kaiseraugst also wärde mir zu de Beer Brothers Kaiseraugst!

Nit lang ischs gange und de Christian het unser ofiziells Logo zeichnet:
Mit däm Logo hämmer denn au vier T-Shirts lo drucke und Caps mit de BBK uffschrift.

Im Summer 1996 hämmer unseri erschti Reis unternoh uff Korsika. Zwei Wuche hämmer dött verbrocht am Schtrand und im Zält. Es isch vill Alkohol gflosse in dere Zit und mir hänn vill erläbt. Natürli hämmer au d'Föteli vo dene Ferie im Fotialbum: BBK in Korsika

E Johr spöter hetts denn gheisse: Ab uff Lloret de Mar in Spanie! Dött simmer nit go zältle sondern mir hänn für zwei Wuche e Apartement gha für uns ganz elei! Fascht jedi Bar und Disco isch vo uns bsuecht worde und jedi alkoholischi Spezialität hämmer umbedingt miesse ussbrobiere. Kei Obe hämmer ussgloh ohni Alk im Bluet! D'Föteli vo dere Reis sinn no in bearbeitig aber folge dämnägscht...

Nomol e Johr schpöter, im Summer 1998, simmer erneut uff Lloret de Mar aber nur für ei Wuche. De Beda hett uns gfahre mit eme chline Nissan Micra. Trotzdäm hetts au denn für uns nur ei Motto gä: "Saufen was das Zeut hält!"

Mit de Zit sind denn no meh Alkoholiker zu de BBK cho: De Michi, de Flücki, de Fredi, de Pätt und de Söle.

Im Johr 2000 und 2001 simer in d'Ferie nach Gran Canaria. Dött hämmer wildi Nächt duregmacht. Einigi Impressione und Abstürtz gits natürli au im Fotialbum: BBK in Gran Canaria

Während de nochfolgende Johr sind laufend neui Mitglieder zu de BBK cho: De Steve, de Urs, de Laubi, de Saladä, de Armin de Chello und de Andi . Mitlerwile zelle mr scho schtolzi 16 Mitglieder. Das hett uns dezue bewegt im Johr 2002 an dr jöhrliche Chilbi e Bar z'eröffne die sogenannti "Sumpfbar". Damit me sich mol wieder so richtig cha d'Lampe fülle! Unser dasjöhrigs Motto isch gsi: "Bei uns kannst du schlucken!!!" und das isch im warsten Sinne des Wortes au in grosse Mänge bassiert! Sit 2002 organisiere mer jetzt scho d'Sumpfbar und dank Euch isch es jedesmol e Erfolg gsi und e riesige Schpass! Einigi Föteli gits natürli au vo de letschte Chilbis uss de Sumpfbar: 2002, 2003, 2004, 2005, 2006, 2007.

D'Urgründer vo de BBK mache natürli au scho sit villne Johr an dr Fasnacht mit bi de Guggemusig Gasseschränzer Rhyfälde. Einigi Föteli vo de Uftritt gits bi uns z'betrachte oder uff dr homepage vo de Gasseschränzer: www.gasseschraenzer.ch

Gmeinsam hämmer scho sehr vill erläbt und userem Name simmer bis jetzt treu blibe! Au in Zuekunft wirds no vill z'erläbe und z'drinke gä, denn mir feschte was das Zeug hält!!!

Euri BBK



© Dezember 04, gschribe vom Bundy und Inka